Noodlottige botsing buite Oudtshoorn
22
February
Die bestuurder van ‘n wit Mazda Sting is vanoggend omstreels 08:00 op die toneel van ‘n botsing oorlede.
Hy was onderweg om sy twee kinders, ‘n seuntjie en ‘n dogtertjie, skool toe te neem toe hulle op die Rooiheuwelpad by ‘n sy-aansluiting voor ‘n aankomende bakkie ingery het.
Die bakkie het die motor aan die bestuurderskant getref.
Die bestuurder, ‘n pastoor van ‘n kerkie op een van die plase, het ernstige hoofbeserings opgedoen en het gesterf terwyl paramedici gepoog het om hom te stabiliseer.
Sy dogtertjie wat links in die motor gesit het, is ernstig beseer en is per ambulans na die Oudtshoorn-hospitaal geneem. Paramedici het die ernstig-beseerde seuntjie deur die luikrug van die motor uitgehaal en hy is met veelvuldige beserings per noodhelikopter na die George-hospitaal geneem.
Die oorledene se vrou het te voet met ‘n babatjie in haar arms sowat ‘n uur na die botsing by die toneel aanghgekom nadat iemand haar verwittig het.
Die identiteit van die oorledene is nog nie amptelik deur die polisie bevestig nie.
Die bestuurder van die bakkie is ongedeerd en werkers wat in die bakgedeelte gesit het, is vir ondersoek na die Oudtshoorn-hospitaal geneem.
Fatal collision outside Oudtshoorn claims life of a father https://t.co/zlsjmmwcxE #ArriveAlive @OudtshoornC pic.twitter.com/s8ml5hk7az
— Arrive Alive (@_ArriveAlive) February 22, 2021
