Imperial Toyota onthul Giniel De Villiers se nuwe Tydren-Vuurwa

Imperial Toyota het sy splinternuwe aanspraakmaker vir die Suid-Afrikaanse tydrenkampioenskap Donderdag-aand hier by ’n geselligheid in Nelspruit onthul. Dié nuwe Imperial Toyota Yaris, wat deur Toyota Motorsport gebou en voorberei is, sal Vrydag en Saterdag in die Sasol-tydren in die hande van Giniel de Villiers in aksie wees, terwyl Greg Godrich die roetenotas sal voorlees.

Die nuwe vierwielaangedrewe tweedeur-Yaris vervang die Imperial Toyota Auris waarin De Villiers van die middel van verlede jaar af saam met sy Toyota Motorsport-spanmaats Johnny Gemmell en Leeroy Poulter in die vooraanstaande S2000-klas deelneem. Gemmell en sy navigator, Carolyn Swan, en Poulter, met Elvene Coetzee langs hom, sal hierdie naweek die tweede keer vanjaar in hul nuwe Castrol-Toyota Yaris-tydrenmotors deelneem nadat dié jongste van ’n reeks uiters suksesvolle tydren-Toyotas hul buiging in Maart vanjaar in die Total-tydren in KwaZulu-Natal gemaak het.

“Ons is baie in ons skik met die feit dat ons Giniel en Greg in die jongste nuwe Toyota-tydrenmotor kan sit,” het Andrew Miller, die uitvoerende hoof van Imperial Toyota, gesê. “Giniel wapper die Imperial-vlag in hierdie opwindende en gewilde vorm van motorsport net so hoog as wat hy dit die afgelope twee jaar in die Dakar-veldtydren gedoen het. Ons wens hom en Greg alle sukses in hierdie naweek se Sasol-tydren en die res van vanjaar se reeks toe.”

Die tydren-Yaris is ’n nuutjie vir Suid-Afrika en Toyota Motorsport, wat in 2006 gehelp het om die baanbrekerswerk vir die bekendstelling van die S2000-klas in Suid-Afrika met die unieke Suid-Afrikaanse RunX-tydrenmotor, wat op die Corolla gegrond was, en sy opvolger, die 2008-Auris, te doen. Hierdie is die eerste Yaris wat enige plek ter wêreld aan ’n nasionale tydrenkampioenskapsreeks deelneem.

Posted on by jonckie

Comments Off on Imperial Toyota onthul Giniel De Villiers se nuwe Tydren-Vuurwa